Accountancy firm pakhat 'Deloitte' in kum khat chhunga European club-te sum lakluh atanga an hausak dan indawt a tihchhuah thin chu tun hnai khan tihchhuah a ni a. Spanish club pahnih Real Madrid leh Barcelona te chu club dangin an phak lo khawp mai.

'Football Money League' ti-a sawi thin hi club ten kum khat chhunga inkhel entute atanga an sum lakluh zat te, khawvel ram hrang hrang leh anmahni ram chhung TV a an inkhelh tihchhuah man atang leh Sumdawnna – sponsorship leh thildang te belhkhawma chhut thin a ni a. Top 20 a awmte'n kum 2010-11 chhunga an sum lakluh belhkhawm chu Euro tluklehdingawn 4.4 lai a tling phak a. Chu chu European Football market-a sum lakluh zawng zawng belhkhawm hmun 4-a thena hmun khat a tling hial a ni.

Top 20-te thlir thuak thuak ila -
1. REAL MADRID: Sum hmuh 479.5m (nikum 438.6m) punna 9.3%
Anni hian a zawna kum 7 nan Money League-ah chungnung ber nihna an hauh leh ta. 2007 atang khan an thang chho zel a, tun hnai kum 5 chhunga an thanna chu Euro maktaduai 200 dawn a tling a, nakkumah chuan Euro maktaduai 500 an hawlh ngei an ring tawh.

2. BARCELONA: Sum hmuh 450.7m (nikum 398.1m) punna 13%
Real Madrid la phak lo mahse Barcelona chuan Cup an chawi mawlh mawlh avangin an inkar a zim chho ta hle a, chutih lai chuan an hnuai chiaha awm Manchester United nena an inkar a zau tial tial thung. Qatar Foundation nena kawr sponsorship deal an neih khan a pui nasa hle bawk.

3. MANCHESTER UNITED: Sum hmuh 367m (nikum 349.8m) punna 4.9%
Premier League-ah an champion a, Champions League final an thleng bawk a, Spain ram tih lohva sum lalut hnem ber an ni chiang hle. AON Corporation leh Nike nena an inremna hian rah ha a chhuah zel a, TV rihghts chungchangah Spain angin England-ah club te thuneihna a ni ve lova, an tuar a ni.

4. BAYERN MUNICH: Sum hmuh 321.4m (nikum 323m) punna 0.5%
Bundesliga-ah an champion lova, Champions League atangin an tla hma bawk si a, an sum lakluh a pung tehchiam lo a, 4-na erawh an la ni phak tho.

5. ARSENAL: Sum hmuh 251.1m (nikum 274.1m) punna 8.4%
Season ruk chhung a zawna Cup an chawi tawh loh hnuah pawh 5-na an la ni zel thei a, an Stadium an tihlen avangin an sum hmuh a pung a, an vannei a, Emirates nena an contract chuan nasa takin a pui bawk. Champions League-a an khel thei reng hi an tlakchhiat hleih theih lohna a ni.

6. CHELSEA: Sum hmuh 249.8m (nikum 255.9m) punna 2.4%
Champions League-ah quarter-final an thleng a, TV a an inkhel tihchhuah man a pung bawk.

7. AC MILAN: Sum hmuh 235.1m (nikum 244m) punna 3.6%
Serie A ah an champion a, kum hmasa aiin an sum lakluh a pung hret. Emirates nen an inremna atangin sum an lalut bawk a, TV atanga an sum hmuhah an innghat lian khawp mai. Champions League-ah an thlen san loh chuan an dinhmun a tha vak lo niin an sawi.

8. INTER MILAN : Sum hmuh 211.4m (nikum 224.8m) punna 6%
Nikumah 9-na an ni a, Liverpool an rawn zuankhum. An sum hmuh zawng zawng zaa 57 chu TV revenue atangin a ni.

9. LIVERPOOL: Sum hmuh 203.3m (nikum 225.3m) kiamna 9%
Top 10-a lang zingah Champions League-a khel lo awmchhun an ni a. 2003-04 season atangin Champions League an khelh loh vawikhatna a ni a, hei hian an dinhmun a tichhia.

10. SCHALKE 04: Sum hmuh 202.4m (nikum 139.8m) punna 45%
Nikumah 16-na an ni a, an rawn zuang sang khawp mai. Champions League semi-final an thlen vang a tih theih.

11. TOTTENHAM: Sum hmuh 181m (nikum 146.3m) punna 24%
Champions League quarter-final an thleng a, Manchester City an rawn zuankhum. An stadium hi England-a Stadium zingah len lama 10-na chauh a ni a, an tihlen hunah tun ai hian sum an lalut hnem zual dawn a ni.

12. MANCHESTER CITY: Sum hmuh 169.6m (nikum 152.8m) punna 11%
An sum lakluh zaah 11 in pung mahse Champions League an khelh ve loh a lang a, mahse tun season-ah an khelh avangin an ziaawm leh nghal ang a, season leh Money League-ah chuan top 10 an ni tawh ngeiin a rinawm.

13. JUVENTUS: Sum hmuh 153.9m (nikum 205m) kiamna 24%
European Competition an khelh loh a lang rak rak khapw mai.

14. MARSEILLE: Sum hmuh 150.4m (nikum 141.1m) punna 6.6%
Kum 7 chhunga a vawikhat nan Marseille chu French club zinga sum lalut hnem ber an ni a, Lyon an lehpel a ni. Champions League last 16 an thlen avangin an sum hmuh a pung a ni.

15. AS ROMA: Sum hmun 143.5m (nikum 122.7m) punna 17%
Champions League an khelh avangin an sum hmuh a pung, mahse ticket atanga an sum lakluh erawh a kiam thung.

16. BORUSSIA DORTMUND: Sum hmuh 138.5m (nikum 105.2m) punna 32%
Kum 10 liamta mai khan an tlachhe lek lek a, mahse tunah chuan 16-na an rawn ni phak ta daih. An sumdawn thiamna vang liau liauva hetiang dinhmun rawn thleng thei hi an ni.

17. LYON: Sum hmuh 132.8m (nikum 146.1m) kiamna 9.1%
Anni hi Marseille-in an rawn lehpel a ni mai lova, PSG an rawn hausa thar leh bawk si a, French club hausa an nihna hi a kiam zel ang tih hlauhawm tak a ni.

18. HAMBURG: Sum hmuh 128.8m (nikum 146.2m) kiamna 12%
European football an khel lova, Commercial revenue-ah chiah an innghah avangin an sum hmuh a kiam nasa hle.

19. VALENCIA: Sum hmuh 116.8m (nikum 99.3m) punna 18%
Champions League an khelh phak ve zel tlat avangin an sum hmuh a pung zel a, Real leh Barca tluk tur erawh chuan beisei chi an ni lo.

20. NAPOLI: Sum hmuh 114.9m (nikum 91.6m) punna 25%
Kum 20 chhunga Serie A a an thlen san ber tum an thlen avangin top 20-ah an rawn lang. Italy-a TV revenue kalphung siam danglam an chhawr a ni.